കൊച്ചി- ഭാരതീയ ജനത പട്ടികജാതിമോർച്ചയുടെ ആഭിമുഖ്യത്തിൽ മഹാത്മാ അയ്യങ്കാളിയുടെ ജന്മദിനം പുഷ്പാർച്ചന, അനുസ്മരണയോഗം എന്നിവയോടെ ആചരിച്ചു.
ബിജെപി ജില്ലാ ഓഫീസിൽ നടന്ന അനുസ്മരണ യോഗം ബി ജെ പി സിറ്റി ജില്ലാ പ്രസിഡണ്ട് അഡ്വ. കെ.എസ്. ഷൈജു ഉദ്ഘാടനം ചെയ്തു.
കേരളത്തിലെ സാമുഹ്യ നവോത്ഥാനപ്രക്രിയയിൽ വിപ്ളവകരമായ മാറ്റം വരുത്തിയ മഹാനായ സാമുഹ്യ പരിഷ്കർത്താവാണ് മഹാത്മാ അയ്യങ്കാളിയെന്ന് അദ്ദേഹം അഭിപ്രായപ്പെട്ടു.
കർഷക തൊഴിലാളി സമരം സംഘടിപ്പിച്ച് അധ:സ്ഥിതജനതയുടെ വിദ്യാഭ്യാസസൗകര്യം ഉറപ്പു വരുത്തിയ അദ്ദേഹമാണ് സംസ്ഥാനത്തെ ആദ്യത്തെ തൊഴിലാളി സമരത്തിന് നേതൃത്വം നൽകിയതെന്നും ഷൈജു സൂചിപ്പിച്ചു.
പട്ടികജാതി മോർച്ച ജില്ലാ പ്രസിഡണ്ട് പി.എ ബാബു അധ്യക്ഷത വഹിച്ച ചടങ്ങിൽ ബിജെപി ജില്ലാ ജന. സെക്രട്ടറി ശ്രീക്കുട്ടൻ തുണ്ടത്തിൽ, മഹിളാ മോർച്ച സിറ്റി ജില്ലാ പ്രസിഡണ്ട് റാണി ഷൈൻ എന്നിവർ പ്രസംഗിച്ചു.
ബിജെപി നേതാക്കളായ സജീവൻ സി എ, മനോജ് ,
പി.കെ. സുനിൽ, ഗോപു പരമശിവൻ എന്നിവർ ചടങ്ങിൽ സംബന്ധിച്ചു.
